MrCU204

實際上你當然唔使眼睇手擰啦，喺10樓講過，隻穩壓管 (或者LED) 做咗基準吖馬，  
負載咪透過個誤差矯正器嘅虛短嚟同個基準對齊，好似並聯咁款囉，綫性穩壓係咁，開關穩壓一樣都係咁， 負反饋係動態平衡，平衡嘅過程書點講㗎，其實，負反饋嘅動態平衡應該係一步到位，就好似普通電阻串聯分壓並聯分流咁，一步到位，如果咁係，就會左揺右擺，之但係，開關穩壓正正就係要佢咁。

MrCU204

Uo⥥→Rw⥥→Uo⥣→Rw⥣→Uo⥥→……  
喱個本來係負反饋動態平衡嘅流程，保持Uo永遠同個基準一樣大細，
如果過咗火位，就會嚯嚟嚯去，變咗自激，最簡單嘅開關穩壓就係咁做，畀電→Uo升→超過基準→斷電→Uo跌→低過基準→又畀電→……，周而復始，咁嘅手段叫做 滯迴模式。

MrCU204

電壓、電流、電阻、感抗、容抗，通通都冇對立嘅性質，但係，開關就有，開同關，係兩種完全相反嘅狀態！  
如果電源同負載都冇變，Uo同Rw 就係一對一嘅關系，清清楚楚，之不過，當你將個Rw換咗做開關之後，就係兩種狀態，兩種截然相反嘅狀態，咁就 冇可能靠一個參數扮晒，你個開關如果係要靠Uo (Vout) 嚟控制嘅話，Vout自然就要俾兩個值出嚟至有得玩。

MrCU204

引用:

#1，上高嗰幅圖

電芯係電源，燈膽係負載，清清楚楚，
喺滯迴模式入便，開關歸電源，線圈屬於負載，
開關，將Vin斬開一碌碌，變成方波，線圈，就係負載嘅濾波器，將方波變成紋波直流，比較器就利用喱啲紋波嚟控制個開關。

MrCU204

Vout，係負載食嘅，負載想要好似電芯咁嘅純直流，好衰唔衰，比較器check嘅就係Vout，咁即係話，個開關做嘢要用嘅紋波就喺正個負載嗰度，所以，喱種開關穩壓器想冇紋波係唔可能嘅事！  
繼電器，英文叫做relay，老行專應該冇理由未見過，將個線圈駁落個接觸點度，畀電，隻relay就會震，〖斷續器〗嘅原理就係咁，
喺頂樓上高嘅電路入便，就可以將開關同線圈砌成斷續器，透過開關同線圈嘅互動，就可以斬波濾波一take過，唔使靠Vout直接指揮，咁樣，唔單止負載食嘅電少咗「牙齒印」，而且成個系統嘅動態響應都爽快好多，喱種玩法，可以睇成係〖電流模式〗嘅原理。

MrCU204

線圈(電感)，如果跟負載，就同電容組成LC濾波器，  
咁有咩問題呢，問題係，LC夾埋，就係個諧振槽路，喺滯迴模式度用冇問題，事關點你都係要震嘅嘛， 之但係，響其他開關穩壓器入便就唔可以咁震法，所以，LC濾波響〖電壓模式〗穩壓器入便就係個隱患，

如果電感同個開關拍檔，砌成斷續器嘅話，就唔再屬於負載而係歸入電源嗰邊，電感，同開關嘅互動就令到Vin好似變咗恆流源咁，而同電容就冇咗諧振嘅關系，冇咗個震子，成個電路就冇震盪嘅隱患，喱個就係所謂嘅「降階」。

MrCU204

滯迴模式係自激型嘅系統，其他模式係由〖時脈〗驅動嘅，唔允許自激，  
電流模式，電感電容雖然仲係黐埋一齊，但係諧振功能就廢咗，成個系統冇咗自激嘅風險，咁樣，電壓環(誤差矯正器)嘅帶寬就可以造返闊些少，對Vout嘅穩定係有利嘅。

MrCU204

開關穩壓嘅三種模式，滯迴模式用嘅係比較器，電壓模式同電流模式用嘅，係誤差矯正器，同綫性電路一樣，  
誤差矯正器睇嘅係Vout，電流模式嘅誤差矯正器叫做電壓環，電壓模式就冇咁叫作嘅。

MrCU204

喂我仲未寫完㗎大哥！  
開關穩壓嘅三種模式，滯迴模式用嘅係比較器，電壓模式同電流模式用嘅，係誤差矯正器，同綫性電路一樣，
比較器同誤差矯正器睇嘅，係Vout，電流模式嘅誤差矯正器叫做電壓環，電壓模式就冇咁叫作嘅，滯迴模式個比較器就更加唔使講。 開關穩壓嘅穩壓精度同動態響應點解差過綫性呢，其實係因為要將個電壓環專登做衰，至可以令到成個系統正常運行。

MrCU204

電壓模式嘅誤差矯正器同綫性嘅一樣，唔叫做電壓環。  
不過，誤差矯正器畀出嚟嘅控制信息，都係純直流，而且係冇做任何手腳就咁攞嚟用，
咁樣表明，誤差矯正器接收嘅信息，衹係Vout嘅純直流成份，啲紋波雜訊佢通通「冇眼睇」，點解冇眼睇呢，因為設計嗰陣整定嘅，電壓模式固之然係咁，電流模式都一樣要咁。

MrCU204

電流模式嘅性能好過電壓模式，係因為，  
動態響應 電流環自己搞掂，唔使靠個「選擇性失明」嘅電壓環，
電感同電容嘅諧振作用廢咗，可以減小電壓環「選擇性失明」嘅需要，對提高Vout(純直流成份)控制嘅精細度同穩定性都有利。



綫性穩壓，用嘅係三極管嘅動態電阻，你將隻管攞咗嚟開關，動態電阻自然就用唔到，不過，「斷續器」可以斬波濾波一take過，將方波就地消化成直流，出嚟嘅效果就好似電阻分壓咁，
而且，電流模式剁走個電流環 (開關+電感+比較器) 剩低嘅，同綫性穩壓剁走隻管剩低嘅架構，係一樣嘅，再加上，電流模式嘅性能唔輸蝕得過綫性嘅幾多，所以我至會話，電流模式就好似將三極管嘅動態電阻「搬」咗落個電感度咁，成個電流環可以睇成綫性穩壓入便嗰一隻三極管(亦就係下低幅圖入便嘅Rw)。

MrCU204

開關穩壓，我唔用電容淨係用電感得唔得呢？！  
咁就要睇吓，誤差矯正器睇嘅，係乜嘢，係純直流呀，
如果冇電容，空載嗰陣電感就過唔到電，咁仲濾唔濾到波呢，濾唔到波，啲方波谷晒落Vout度，你叫個誤差矯正器點跟呀，
有電容，個電容放唔到電，Vout至多係高啲，起碼係平整嘅，個誤差矯正器仲知道點做嘢。

MrCU204

開關式串聯穩壓，同〖電荷泵〗係唔一樣嘅，點唔一樣呢，就係唔可以淨係用電容。  
所以，滯迴模式，電壓模式同電流模式，都要擺個電感喺度，仲要係靠電感做主力添，
不過，電感電容撞埋就會成為系統 (唔包括滯迴模式) 自激嘅隱患，電流模式唔單止消除咗喱種隱患，仲可以做出同綫性運用等效嘅效果。

MrCU204

好多時聽人講話咩〖DC-DC-converter〗，其實邊啲至係，〖LDO〗算唔算？！  
LDO係綫性穩壓，同普通綫性穩壓嘅做法一樣，都係分壓嚟啫，12V入5V出，肯定唔係LDO啦，隻Rw食嘅電仲多過個負載，兼且㷫合合，嘥電不特止，對環境同隻「Rw」自己都唔安全，
線圈阻力好細 (甚至可以忽略)，但係佢擋電嘅效果仲好過電阻，佢擋電用嘅係自感電勢，係無功，因為本身冇阻力，佢擋電擋得嚟又可以過好多好多電，完全冇話㷫合合。

MrCU204

電阻，衹係齋過電 (同埋耗電)，分壓，淨係識得跟比例，所以，負載想要純直流，電源就一定都要係純直流，  
電感就唔同嘞，一方面，就算負載short咗，成個電源電壓受晒一樣冇損耗，二來，就算電源電壓係零，電感一樣有貨交，喱樣，電阻根本冇可能，
有人駁我話，濾波唔等於分壓，係吖，不過我幾時有話濾波即係分壓呢又，而且，電源出12V嗰陣，7V壓差邊個哽呀，咪又係電感！