MrCU204

ZCS同ZVS，都係 軟開關。
點軟法呢，就係搞到隻管冇電到，等隻管開定咗或者閂陷晒至俾佢過返電。

MrCU204

想搞到隻管冇電過，可以箝佢位或者阻塞住佢，  
箝位，就係搵個元件同隻管並聯，咁樣，隻管就會有個實打實鑿嘅分壓，ZVS，就係要喱個分壓係 0V，
將管腳剪斷，即係冇路行，隻管自然過唔到電啦，你楔 (串聯) 個阻力好大嘅零件入去，都有類似效果，咁嘅做法就係ZCS嘞。

MrCU204

實際上，衹要個電路係完整嘅，唔論你駁成點，每個埞方都一定有分壓嘅，
如果你「塞住」隻管，咁電源電壓就俾個障礙物受晒，隻管嘅分壓可以當係零，之但係，個障礙物係經隻管食電㗎，所以我覺得，咁唔算係真正嘅ZCS，
除非將成個電路斷開，電路唔通，自然咩電流都冇晒，咁，唔想斷開電路又要冇電流得唔得呀，原來係得嘅，串隻二極管落去添就得嘞，電容透過喱隻二極管將成條電路頂死，三極管就好似管腳剪斷咗咁，完全過唔到電，右下角嘅架構就起到咁嘅作用。

MrCU204

電容嘅電壓(靜電勢)如果高過電源電壓，電源就唧唔出電嚟，
電容可以向電源放電，之但係俾個二極管頂住，於是乎，電源同電容都唔會有電懟入隻三極管度，
可以見到，要做到真正嘅ZCS，要比ZVS多用一隻二極管，而三極管最好係揀 冇逆導二極管 嘅型號，
不過，二極管係個 非綫性電阻，多一個「電阻」，就多一啲損耗兼嘥多啲電，有損耗就會㷫，有溫升就會俾人唔夠安全嘅感覺。

MrCU204

所以，左邊嗰拃都唔係完完全全嘅ZCS，頂頭嗰個根本就係ZVS嚟添！
右邊嗰拃都算係ZCS，不過，最下低嗰個電路，電容係接地嘅，同隻管係串聯，想「阻街」好容易，一畀電就塞得，
上邊兩個就要諗辦法將電容嘅電壓倒轉，如果唔倒轉，上高嗰個係ZVS，因為個二極管係通嘅，中間嗰個就係單管硬開關。

MrCU204

有人反駁我，話逆導二極管同軟開關根本冇啦楞。  
軟開關係動態，而針對嘅係正向運作，亦就係  左正右負嘅電壓同埋由左向右嘅電流，反向嗰陣隻管經已cut-off，根本就唔做嘢。

MrCU204

佢話，啲二極管嘅作用，一係防止駁錯電，二係唔俾軟開關嘅運作騷擾到嗰啲休緊息嘅管，  
軟開關根本係唔使靠啲二極管過電，之不過軟開關有度衰，就係啲「無功」會反方向懟落啲休緊息或者未閂陷嘅管度！
如果懟得太拫，啲三極管就會好似駁錯電咁樣分分鐘瓜得，二極管，就係借助「反接保護」嘅作用嚟擋住或者跣開啲逆向衝撞。

MrCU204

嗱，咁點樣至合符軟開關嘅標準先？！  
就係要開同閂嗰吓冇電到吖馬，問題係點至算 零電流 先？！

MrCU204

要個電路做到嘢，就唔可以斷開，喺上咗電又唔開得路嘅前提下要冇電到，有咩偈呀？！  
咪就係將兩點short埋，或者畀個反電勢落去囉，咁樣做嘅效果，就係嗰兩點嘅電位差係零，電位差係實實在在嘅分壓，咁即係話喱種做法其實係ZVS，如果唔用止回二極管，隻FET兩頭都受電(等電位)，咁不過係間接性嘅ZVS，電位一唔相等就有返電流，做唔到ZCS，逆導二極管嘅性質係旁路，鉗位，成條電路係通嘅，度度都有電位，隻FET唔論做唔做嘢，身上嘅壓降都係實打實鑿，所以我話咁嘅開關都仲係ZVS性質。

MrCU204

或者換一個講法，  
電流電壓係咪零唔好理住，先睇隻三極管嘅配置係乜嘢話事，
電勢又好壓降又好，有親就一定係兩頭，電位，其實都係兩頭，不過係任何一點對地啫，
如果冇止回二極管嘅話，任你電源或者電路點樣駁，隻三極管都一定有電壓，三極管俾電壓食住，如果電壓唔係零嘅話就一定有 Ic，你用逆導二極管做旁路，電壓一樣喺度，所以衹係可以做ZVS，有止回二極管嘅話，你頂住咗逆向電壓，三極管就好似將管腳剪斷咗咁冇電到，咁至算係零電流。

MrCU204

唔同埞方嘅電就要有唔同嘅通路，扼流圈可以當做係電路嘅第二個電源，續流二極管係扼流圈要嘅通路，如果冇續流二極管，負載就食唔到扼流圈畀嘅電，
不過有樣嘢要記住，續流二極管係跟負載嘅，千祁唔好駁去Lr(諧振電感)嘅左便，Lr 衹係為ZCS服務，Lr 嘅貯能係愛嚟塞住隻三極管，唔係畀負載食嘅。

MrCU204

好嘞，又有人駁我話，扼流同濾波 唔一樣， 扼流，用嘅係阻力(感抗)，濾波，係能量嘅呑吐調撥，  

佢話，如果用感抗，係唔使續流二極管嘅，濾波至要，濾波要嘅係能量，幅圖入便嗰隻 Lf，個名都話到明你知佢係濾波電感嚟。

Natheline

回覆 12#  MrCU204 的帖子  睇唔明

MrCU204

引用:

#11&12

唏，係吖，Lf 係平波電抗器我都知，不過，用嚟做阻抗嘅係咪唔使 續流二極管 呢就要睇情況。

光管嗰隻「牛」(鎮流器) 係乜嘢續流都唔使嘅，佢嘅作用就同你點LED串電阻一樣，整流，已前會有 電感濾波 喱家嘢，電感濾波唔續流，輸出嘅直流電壓就會好細兼冇力，不過，大問題係唔會有，
但係，如果好似11樓個綠色框入便嗰窟嘢咁玩作，隻管隨時俾個電感打瓜，事關通路斷咗之後冇嘢續流，啲貯能自然就冚辦冷懟晒落隻管度！
不過，如果先將通道塞住 (ZCS需要嘅佈置) 然後至整熄隻管，就唔會有咁嘅問題，因為，電感啲貯能經已嘔清光，冇得惡，所以唔使續流二極管，反而係隻管準備關斷嗰陣，電容電壓經已高過電源電壓，隻管一閂就會硬食個反向電壓，止回或者逆導二極管嘅作用，就係將喱個反向衝擊擋住或者瀉走。

MrCU204

引用:

原帖由 Natheline 於 25/5/2024 19:47 發表 回覆 12#  MrCU204 的帖子  睇唔明

就算成個topic睇唔明都唔緊要，你有冇自己嘅問題想問，衹要係 關ZCS事嘅 都可以嚟喱度問㗎。