Uwants TV消閒生活手機討論遊戲地帶影視娛樂校園生活數碼科技寵物樂園學術文化體育世界購物廣場時事投資貼圖影片上班一族美容纖體戀愛婚姻汽車討論成人資訊博彩娛樂資源交流站務管理
發帖
註冊 登入/註冊
追帖 打印

[其他] 你不是一個人



[其他] 你不是一個人

[隱藏]
今次呢個post唔係叫人走數,而係想向每個借扣底或電話數嘅人講,唔好為面子而唔同屋企人坦白,如果無人幫就返多份工,紙係永遠包唔住火,所有數只會愈滾愈大,我想將我嘅故事分享,有d嘢踏出咗第一步,就返唔到轉頭,希望未行呢步前嘅人真係停一停,諗一諗,唔好令自己後悔終生


曾經只有1線數嘅我,將20幾萬數睇到天咁大,每間借幾萬,平均每間還幾千,1個月還1萬3已經覺得好大壓力,不斷續數同申請,將自己tu搞到花哂,因為屋企有小朋友,開支都唔少,有一段時期連1萬3都攞唔到,最後做咗人生第一件錯事,唔知頭唔知路嘅我借咗其中一間全港頭3名黑嘅2線,低能到扣尾2期重以為無乜特別反正可以還小2期,就係咁,本身每月1萬3變咗每月1萬6,然後日日收到唔同中介搵我錢,慢慢一唔掂就依賴2線,扣尾期變咗扣底,扣20變扣25,最後連電話數都主動搵我,無時間出去跑,走去借咗1間頂1期2線嘅錢,不知不覺變成數冚數,最後電話數足足40幾間,銀碼1條由幾千變過萬,最後大數總共50萬,當然實攞30萬左右,日日要睇時間入錢,好小小嘅比多半個鐘你走盞,每月單單電話數還18萬幾,無睇錯,係還18萬幾,足足還咗差不多一年,當然本金係無扣過,本來都想繼續還落去,直到有一日,因為星期六日跑唔到數嘅關係,遲還咗1間2線數2日,星期一佢一早搵哂我所有資訊人,件事穿咗,全世界要同我斷絕關係,無奈之制,電話數亦開始追,壓力爆哂煲,無面目見所有人。最後我決定放過自己,如果屋企人係我一直隱瞞嘅底線,穿咗1間其實已經返唔到轉頭,最後膽小嘅我決定豁出去----全部走哂數,諗到嘅所有嘢都有發生,炸爆資料人電話,信息,淋嘢,貼紙通通都有發生,最後我報咗警,重好記得cid接手後,當住我面用我電話打比其中一間電話數鬧,可能因為好多間已經還足本金有突,所以阿sir最後叫我1蚊都唔好再找比班吸血鬼,欠債還錢唔代表搶錢,就算比你清到數佢哋都可以屈你未找。除咗老婆仔女,我失去咗份工作同兄弟姊妹,無人幫,亦無人原諒。我連累咗咁多人受滋擾,憎我係情有可原,我自己亦原諒唔到自己,我淨係知道如果自己當初坦白就唔會有今日嘅局面,由每月還1萬3嘅數,演變成每月所有數合共還20幾萬。呢個就係唔坦白,唔識理財嘅後果,同時亦係電話數嘅利害之處,我開呢個post唔係鼓勵大家走數,而係想大家知道就算屋企人唔幫,一個人收埋哂所有嘢你都撐唔得幾耐,如果未開始接觸扣底同電話數嘅你就千萬不要試,萬一已經接觸咗就即刻要stop佢,數冚數係唔會有完結嘅一刻,而且紙真係永遠都包唔住火,除非你突然有舊錢可以一下子全部清哂,否則只係推自己上絕路。
依家每日唔洗再諗跑數,唔洗再怕遲還罰錢,現時已經走咗4個幾月,好感謝我老婆對我嘅不離不棄,未來嘅事唔知,但至少可以唔再辛苦地呼吸新鮮空氣,如果當初坦白,就算無人幫到,至少都唔係一個人面對

回覆 引用 TOP

當去到某個位,你會發現自己要嘅唔再係朋友借錢比你去頂,而係簡單一句加油,同埋要撐住

回覆 引用 TOP

引用:
原帖由 cholelau4201 於 2021-7-27 02:07 PM 發表
回覆 1#  山邊勁水果 的帖子
你宜家可以唔洗怕跑數, 仲可以儲錢TIM, 但你家人咨詢人每天都胆心比人攪比人上門....人地唔係老馮幫你受ED 野.
首先我從來無話過,又或者覺得係老馮,正如我講過我自己都原諒唔到自己,我預咗一定會有人衝出嚟數我不是,就算無人數,我都覺得自己錯得好徹底,亦對唔住好多人,所以我開呢個post主要係想將自己嘅經歷同大家分享,希望各位去到絕路時可以停一停諗一諗,唔好比自己更加錯落去




回覆 引用 TOP

有時候你嘅出發點同人哋嘅見解有所不同,我唔係想表達自己走數幾巴閉,連累人點樣若無其事,我係想用親身經歷話比大家聽唔好比自己一錯再錯,絕路時無論如何都要同屋企人坦白,幫唔幫已經係另一個問題,最重要係唔好一個人收埋哂所有事,頂唔住始終會爆,恨錯難返,呢個係我要帶出嘅信息

回覆 引用 TOP

[隱藏]
引用:
原帖由 op750 於 2021-7-27 04:04 PM 發表
師兄,好明白你感受🙏
所以點解我標題寫你不是一個人,係因為我知道一定有好多身同感受嘅人,我希望佢哋未行到我呢個位,坦白永遠係最好嘅選擇

回覆 引用 TOP

引用:
原帖由 橋頭古牛牛 於 2021-7-27 05:05 PM 發表
患難見真情,珍惜嗰d係你落難仍願意幫你,一齊行下去嘅人,加油!
一定會好好珍惜,大家加油

回覆 引用 TOP

呢個世界大把破過產嘅人,或者佢哋都唔應該改過自新,最好成世做地底泥,睇你哋嘅口吻應該成個人生從來無做過錯事,從來無失敗過。錯要認,打要企定,我對唔住自己家人係不爭嘅事實,就算佢哋點話我都唔會反駁一句,但嗰d話你有幾爽,純粹為落井下石嘅鍵盤戰士就真係唔洗講咁多廢話喇,上得呢個版唔係債仔就係中介,爭人錢嘅壓力有幾辛苦我好清楚,走數一定係自認為去到已經走投無路先有呢個勇氣,如果你唔明,咁你嘅身份就應該唔係債仔嗱,如果走咗數重可以笑得出我相信大把人為咗呢個笑而選擇破產,唔洗再扭曲我意思喇,我知道自己做錯,亦會努力補償欠我家人嘅嘢,希望大家唔好 好似我咁,一錯再錯,恨錯難返

回覆 引用 TOP

引用:
原帖由 hrakit 於 2021-7-27 11:42 PM 發表
走數無問題 不過想知樓主有無破埋產?
有破,但老實講電話數根本唔會理你有無破




回覆 引用 TOP

引用:
原帖由 前晚扁扁的水管 於 2021-7-27 11:28 PM 發表
樓主係搬走左定點?你走咁多間數 正路日日都有人上門 咁唔煩咩
最後搬走咗,但未搬之前其實都唔會日日上門,放低信就一定有

回覆 引用 TOP

[隱藏]
引用:
原帖由 kt147258 於 2021-7-27 09:18 PM 發表

你咁講。 咁點解有肺炎個班中晒招、唔走去死左佢、搞到1個傅1百個、咪仲累人累物? 你一世都順風順水既? 明知六合彩係中唔到、咁點解仲去買?你又點知人地中唔到? 還唔起?
同呢d人講係無用,佢哋嘅世界只會係有咩都唔好煩到自己嘅心態,其實每個人借錢嗰陣都會覺得或者幻想自己會頂到,我相信唔會有人明知還唔到都突登去借,就如你個六合彩例子一樣,每個人都會幻想自己有可能中,如果你百分百話比我聽唔中,我真係10蚊都唔會哂錢買,<明知>呢個字眼只不過係for一d當你做錯而又比人事後孔明嘅形容詞,好多事其實係做咗先知,只要衰咗就比人當成明知都去做,如果有咁多明知就唔會有人生意失敗,就算你知錯認錯都好,佢哋都會話你明知然後抵死,可能佢哋嘅世界太美好,從來無錯過,亦唔容許有一次犯錯

[ 本帖最後由 山邊勁水果 於 2021-7-28 12:33 AM 編輯 ]

回覆 引用 TOP

引用:
原帖由 前來失控的希望 於 2021-7-28 12:34 AM 發表
加油,我都已走一年,不用理人閒言閒語,自己之後重新做人就得,始終未來日子都係自己行
師兄係咪都有破?真係要重新做人,大家加油

回覆 引用 TOP

引用:
原帖由 cholelau4201 於 2021-7-28 09:01 AM 發表
回覆 33#  山邊勁水果 的帖子
讀多D書先揾D好比喻,你明知唔中六合彩唔影到人, 你走數就會, E個係你明知的,你以為自己有事一定有人幫, 而家無就埋怨D朋友唔幫手有剩. 但你無諗人地等唔等錢洗喎.
咁係咪讀過書嘅人會唔同d,人哋無講過嘅嘢會比你幻想當成真?好想問吓你我有邊句係埋怨朋友唔幫手?點解我從來無認為過嘅嘢會比你講到似層層?你話我無諗人哋等唔等錢洗?無人幫就埋怨朋友唔幫手?你唔好嚇我喇大佬,你係咪思覺失調呀?

回覆 引用 TOP

引用:
原帖由 cholelau4201 於 2021-7-28 12:29 PM 發表
回覆 45#  明日外圍的豬豬 的帖子
樓主重新方法係走數, 同老婆走佬...揾到自己洗....唔洗跑數,宜家呼吸緊無壓力既空氣樓主教曉我地, 還唔掂就走,把問題留比屋企人...自己可重頭來過... 快過破產
我幾時有話過自己無破產




回覆 引用 TOP

引用:
原帖由 cholelau4201 於 2021-7-28 12:29 PM 發表
回覆 45#  明日外圍的豬豬 的帖子
樓主重新方法係走數, 同老婆走佬...揾到自己洗....唔洗跑數,宜家呼吸緊無壓力既空氣樓主教曉我地, 還唔掂就走,把問題留比屋企人...自己可重頭來過... 快過破產
同埋搵到自己洗呢樣嘢係你自己幻想出嚟咋喎,我講咗慢慢補償比屋企人,你又話我搵到自己洗,我覆咗留言話破咗產,你又話我走佬快過破產,其實你哋可唔可以唔好再將你哋幻想嘅嘢套落我身上,呼吸無壓力係因為以前入遲一分鐘就罰息,好重壓力當時搞到個人呼吸都覺得辛苦,咁我依家破咗產無呢個嘅壓力又要比你話?你講到我依家好似喺到嘆世界咁,你係咁扭曲我意思為咩

回覆 引用 TOP

[隱藏]
大家分返清楚一樣嘢,法律上我已經破咗產,由始至終我都承認自己欠咗屋企人,開post嘅目的只係想大家唔好行錯呢步,有咩都要同屋企人坦白,你可以話我做錯,我絕對承認,但唔好再將你哋幻想嘅嘢套喺我身上,錯一件事唔代表其餘嘢都要比你哋幻想去屈。最後講多一句,發生咩事都好,唔想將自己推向絕路一定要坦白,未過到自己心理關口嘅話搵社工傾又好,朋友傾都好,搵一個方向比自己,時間唔等人,唔好比自己一錯再錯

回覆 引用 TOP



伸延閱讀
[按此隱藏 Google 建議的相符內容]
 16 12
 提示:支持鍵盤翻頁 ←左 右→ 發新話題發佈投票
請先登入
小貼士:
依家可以用“@”tag會員啦!




重要聲明:本討論區是以即時上載留言的方式運作,Uwants.com討論區對所有留言的真實性、完整性及立場等,不負任何法律責任。而一切留言之言論只代表留言者個人意見,並非本網站之立場,讀者及用戶不應信賴內容,並應自行判斷內容之真實性。於有關情形下,讀者及用戶應尋求專業意見(如涉及醫療、法律或投資等問題)。 由於本討論區受到「即時上載留言」運作方式所規限,故不能完全監察所有留言,若讀者及用戶發現有留言出現問題,請聯絡我們。Uwants.com討論區有權刪除任何留言及拒絕任何人士上載留言 (刪除前或不會作事先警告及通知 ),同時亦有不刪除留言的權利,如有任何爭議,管理員擁有最終的詮釋權。用戶切勿撰寫粗言穢語、誹謗、渲染色情暴力或人身攻擊的言論,敬請自律。本網站保留一切法律權利。


Copyright © 2003- Uwants.com All Right Reserved.
版權所有,不得轉載。