Uwants TV消閒生活手機討論遊戲地帶影視娛樂校園生活數碼科技寵物樂園學術文化體育世界購物廣場時事投資貼圖影片上班一族美容纖體戀愛婚姻汽車討論成人資訊博彩娛樂資源交流站務管理
發帖
註冊 登入/註冊
追帖 打印

[轉載]寫給有機會或即將可能入獄的你:



[轉載]寫給有機會或即將可能入獄的你:

[隱藏]
寫給有機會或即將可能入獄的你:
相信同絕大部份人一樣,我哋對坐監嘅印象嚟自監獄風雲、同囚、一獄一世界….等等數之不盡嘅電影,但本人經歷六個月嘅體驗,監房嘅世界已經再唔係好似電影咁黑暗殘暴(當然都有黑暗嘅一面),聽講少年監獄(即未滿21歲人士)都已經再冇‘同囚’電影咁恐怖,本人只去過荔枝角,即香港所員密度最高嘅監房。

先介紹一吓荔枝角收押所,入邊還押犯人(灰衫褲、未判)約1000左右,定罪犯人(啡衫褲、有期走)約300人左右,荔枝角基本上係中轉站,即所有犯人都必須經過荔枝角,絕大部份還押犯人都會留係度,少部分短刑期定罪犯都會留喺度工作。根據到達不同法院審訊(高院去赤柱),還押犯人都會‘過界(轉監房)’。
請唔好期望監獄會好乾淨,老鼠曱甴隨處可見。如你有潔癖,放心,你會介到。同樣地唔好諗住伙食好好食,你會懷念麥當勞。

首先本人提醒各位,如果你係已定罪有期走嘅人,入到去千萬千萬千萬唔好同人嘈交或打交,定罪犯人一打交就會鎖”水記(單人倉)”,繼而過界再加監(加長刑期)。

入正題,入刑去最難捱係頭七尾七,頭七因為唔習慣,喊同失眠都係正常,個個人都會,所以盡情喊,冇人會笑你。

法庭篇
首天當你被判有期徒刑後,庭警會帶你到法庭臭格(暫時還押),入邊只有硬長凳同一個開揚廁所,你需要交出所有隨身物品包括鞋帶所有繩嘅嘢(都可以要求交俾家屬,唔係就由懲教署代為保管直到你出冊當日),喺入臭格前你需要脫光所有衣服被警方檢查(不需通櫃),檢查完穿好衣物就俾張紙仔你寫低啲電話,之後用佢哋提供嘅有線電話通知你要通知嘅人,通知完就正式入臭格等囚車到達,等待時間就話唔埋,要睇架車幾時到,假如你係煙民亦可向庭警R煙,通常都俾。
當到達後你要再除一次衣物俾懲教職員再檢查一次(不需通櫃),檢查完畢後就會兩人一組帶上手扣上囚車,直到荔枝角。

荔枝角篇
到達荔枝角收押所後,你會被帶到指摸房(大堂,類近做登記手續),等職員叫到你你就要出去俾基本資料佢,同時會問你有冇背景(有就會分到不同期數),黑手(即入獄一次以上)定白手(第一次入獄)。
待全部人都提供晒資料後就會去度高磅重剪頭髮,第一次剪一定係柒,但之後再剪因為人唔同所以會好好多,因為老鬼監房(21歲以上)唔需要剷光頭,只要唔長得過分就得,之後會去照死光(X光),冇錯而家已經冇咗所有人都怕嘅通櫃,轉咗X光,照完之後就會去換囚衣再見官影相,影完相會分一張白色牌仔(監房身分證)俾你,跟到你出冊,上邊會寫有你最早出冊日期及最遲出期日期。如遇紅日則再提早一天。
搞掂晒所有嘢之後你會獲發基本生活用品:
茶嘜(杯)x1
艇仔(膠匙羹)x1
小毛巾x1
所員需知小冊子x1
牙刷牙膏x1
之後就會安排你去新翼(分新舊翼)做21日隔離,拎碟飯食(絕對冇你上網搵嘅圖咁靚咁美味),食完就會去臨時期數(7人倉)準備瞓教(通常去到哩步都已入黑),你會再獲發:
硬海棉枕頭x1(不洗不乾)
枕頭袋x1
藍被x1
薄床單x1
黑氈x1(只乾不洗)
別期望以上床品好乾淨,去到你手已經可經數以萬計人用過,之後你就整理你張會瞓到骨痛又有機會過敏嘅床,千祈唔好揀廁所門口位,因為都只會係度瞓21日,所以基本上冇乜人會仔細清潔廁所,順帶一提,如果你有陰陽眼,半夜瞓醒唔好周圍望。
第二日6:30就會有超大聲電台(爆貓)叫你起身,倉內都會開晒燈,你係會必醒,之後就會有職員教你折一次正方形起角嘅被,當然由於老鬼監房較為寬鬆,所以你唔起角都冇問題,但要有個形。
起身半小時左右刷完牙洗完面就會有職員帶你去放風,你鍾意可以坐唔郁又得做運動又得,做運動必須換運動服。
大約半個鐘至九個字,就會沖涼,一個水柱射到肉痛而又冇間隔嘅公共浴室,等全部人沖完涼就集隊正式上期數。有乜做?基本上你係喺一個空間全職全日坐係度睇電視,你可以卜係台瞓教,但唔可以‘擺橫(灘係度)’,你可以捉吓象棋,可以吹水或同職員吹水,星期日可以打康樂棋,期間不定期會抽人去‘擺柳(痾尿或驗尿)’同‘擺堆(痾屎或驗屎)’,緊記如果有人或職員問你食唔食煙,死人都話食,煙=錢,俾煙可以叫人做嘢、換人食物或將來買零食。

9:00左右就會食第一餐早餐,一舊肉一詐菜一碟飯(隔日不同肉菜)。
10:00左右福利官會嚟,有咩問題可以問佢,咩都得。
10:30左右就會‘接殺’,官會去到你期數問有冇要求投訴,有就舉手,只要你一舉,我保證你往後日子會比死更難受,而當刻你只準許講[morning sir]。
11:00至12:00左右食午餐,有’妹(豆粥)’同一片三方形方包。星期日會多一桶你唔會想飲嘅奶茶。
2點係第一個最期待嘅時間,因為派家書(信),星期一至五,有就有冇就冇。
3:30左右第二次接殺,同樣你只可以講afternoon sir。
4:00係你第二個期待時間,因為係定罪犯人拜山(探訪)時間。
5:00左右就係晚餐,都係一塊肉一詐菜一碟飯,隔日不同,晚餐多隻橙,需即食不可帶返倉,但當然偷雞就冇人理到你。
6:00左右就會返倉休息準備瞓教,臨上倉前會有人派提子包同奶粉溝出嚟甜到嘔嘅奶俾你做瞓前餐點。
8:00正準時就會再爆貓(香港電台第二台),直到10點,即係話你想7點瞓教,sorry,你唔會瞓到,唯一慶幸9-10有鄭子誠音樂情人聽。

回覆 引用 TOP

引用:
原帖由 焦急勁花貓 於 2021-5-3 08:31 PM 發表
寫給有機會或即將可能入獄的你:
相信同絕大部份人一樣,我哋對坐監嘅印象嚟自監獄風雲、同囚、一獄一世界….等等數之不盡嘅電影,但本人經歷六個月嘅體驗,監房嘅世界已經再唔係好似電影咁黑暗殘暴(當然都有黑暗嘅一面),聽講少年監獄(即未滿21歲人士)都已經再冇‘同囚’電影咁恐怖,本人只去過荔枝角,即香港所員密度最高嘅監房。

先介紹一吓荔枝角收押所,入邊還押犯人(灰衫褲、未判)約1000左右,定罪犯人(啡 ...
一日就咁結束,每日重複直至14日後你就會分批見官,決定你留係荔枝角做嘢定過界做嘢,但係必須做嘢,你冇得選擇,當刻嘅你一定會好期待可以做嘢信我。
第21日就係你嘅期數分道揚鑣嘅時間,假如你被安排留係荔枝角做嘢,1年內都好大機會留係荔枝角,你會被安排去舊翼,荔枝角分7個工種:

指模房:
工作:安排新所員文件
好處:星期六半day,紅日放假,文職多,有冷氣
壞處:容易被屌,工時不定,一般最遲收工(8-9,特殊情況10-12都有)

樓梯期:
工作:搬運,體力勞動
好處:早收,約7點
壞處:冇紅日冇假期

圖書期:
工作:派人哋入嘅嘢,包括食物、家書、聖(書)、報紙
好處:輕鬆舒服有冷氣,星期日半天工作
壞處:最難入

氈房:
工作:雜項、倒垃圾掃地拖地清潔
好處:福利最多,職員隻眼開指數最高,最易搵錢,長期有煙食
壞處:勞動,重複性工作,冇紅假

廚房:
工作:煮食,分4-10工時同10-6工時
好處:伙食最好,通常自制食物
壞處:環境較差,冇紅假

木工期:
工作:主力維修,逗木
好處:勞力上較輕鬆
壞處:所有維修事項

醫院期:
工作:護士
好處:實際工時短
壞處:有機會接觸屎尿,冇紅假,一般8-9pm收工

水記留倉:
工作:照顧被鎖水記人士
好處:最輕鬆,較易得到煙,早收工
壞處:被屌,要服侍老細(管理你的職員)

以上工種起薪點約100多元,供你每月第二個星期出糧單買零食或日用品,職級不同薪金不同。同樣地零食售價較外界低。
定罪犯人都可以透過家屬入日用品,但放入口的都唔入得,包括牙膏零食,每次入嘢都必須拜山,疫情每月兩次,每次半小時。
每個星期一同三不得探訪,每個星期二重新計算寄信日,每星期一封信,當然你用人哋number寫又吹你唔脹嘅。
千祈唔好叫屋企人入口罩,入邊極大量。

白板至三柴職員稱呼:乜哥,例如俊哥 維哥
三柴以上:sir,例如李sir 周sir
緊記必須叫人,唔識都要叫sir,白板都要sir

術語
白手:首次入獄
黑手:多次入獄
老職:職員
老細:管理你的職員
ON(分開讀 唔係安):外藉人士
i i :中國人
所員:在犯人士
聖:書
i i 聖:大陸書
Like聖:寫真,打飛機專用
Like版:男極圈
落like:打飛機
高登聖:網絡小說嘅書
家書:信
又食:食飯
妹:粥
嘜:杯
刮仔:梳
黃驚:運動鞋
拖水:毛巾
期數:類近班別
漿水:洗頭水或沐浴露
擺橫:攞屍
攞柳:痾尿或驗尿
擺堆:痾屎或驗屎
拜山:探訪
接殺:高官巡視
水記:單人倉
薄荷仔:老職有機會跌給你的非濃煙
貓:收音機
貓鬚:耳機
貓糧:3A細電池
死光:X光
牛:綠色垃圾車
爆哨:倒垃圾
打水:裝水
西瓜:拖鞋
死老鼠:臭襪
老鼠:襪
玻璃袋:透明袋
藍燈籠:藍色短底T
厚笠:衛衣
抓毛:毛冷衫
拜神褲:睡褲
拜神蓆:竹蓆
隻:月
碌:年
泊正:定罪
泡(讀音係氣泡個泡):還押
水房:沖涼房
CatA:重犯
祠堂:赤柱監獄
細壁:壁屋
大壁:石壁
過界:調到其他監房
度頸:吊頸
揹簿(咩簿):自殘傾向
猛龍:煙咀接駁頭(捉到會鎖水記)
私飯:還押犯人專屬私家飯(真·茶記),同上會鎖
橙酒:自製酒精,會鎖,嚴重
買子彈:付費代打人,會鎖,嚴重
朵紙:類似傳紙仔,期數經其他人傳到其他期數,多為隻眼開隻眼閉
骨仔:藥物
大P/細P:著名P字頭藥
三寶:大細p加止痛藥
還押三寶:m&m 魚皮花生 蔥餅
定罪三寶:洗頭水 沐浴露 毛巾
更頭簿:老細記錄所員申請事項

以上大概係我自己嘅經驗,入獄並唔好捱,入邊一個月大概係出邊兩個月嘅感覺,所以做人都係要行得正企得正先係最好。

回覆 引用 TOP

引用:
原帖由 焦急勁花貓 於 2021-5-3 08:31 PM 發表

一日就咁結束,每日重複直至14日後你就會分批見官,決定你留係荔枝角做嘢定過界做嘢,但係必須做嘢,你冇得選擇,當刻嘅你一定會好期待可以做嘢信我。
第21日就係你嘅期數分道揚鑣嘅時間,假如你被安排留係荔枝角做嘢,1年內都好大機會留係荔枝角,你會被安排去舊翼,荔枝角分7個工種:

指模房:
工作:安排新所員文件
好處:星期六半day,紅日放假,文職多,有冷氣
壞處:容易被屌,工時不定,一般最遲收工(8 ...

好詳細,我一字不漏睇晒




回覆 引用 TOP

暴徒們快啲嚟睇🤗
參考定將來嘅窂獄生活點過😆

回覆 引用 TOP



伸延閱讀
[按此隱藏 Google 建議的相符內容]
 提示:支持鍵盤翻頁 ←左 右→ 發新話題發佈投票
請先登入
小貼士:
依家可以用“@”tag會員啦!