Uwants TV消閒生活手機討論遊戲地帶影視娛樂校園生活數碼科技寵物樂園學術文化體育世界購物廣場時事投資貼圖影片上班一族美容纖體戀愛婚姻汽車討論成人資訊博彩娛樂資源交流站務管理
發帖
註冊 登入/註冊
追帖 打印

[小說] 悠閒的天使 -講得出的小說,聽得到的故事



悠閒的天使 -講得出的小說,聽得到的故事

[隱藏]
 

悠閒的天使 A (正常版)

悠閒的天使 A (急速版)

悠閒的天使 B (正常版)




【受難】


雪麗莉, 一個由平凡天使想晉身成為邪惡天使既一個女仔,督咗果口眼中釘美檸檬落凡間,而果隻黑熊又唔識死陪埋佢落去,好吖, 睇我一次過點整治你地。美檸檬同黑熊當晚就跌咗落凡間,哈,掉佢地落去前唔記得同佢地講,天庭會暫時收返佢地既法力, 落到去既佢地大概同普通人類既能力差唔多。 哎呀,一齊跌咗落個木屋區屋頂咁慘呀? 呵呵,抵死。



鏡頭一轉就去到美檸檬同黑熊度,兩個跌到攤攤腰,而咁難睇既情況比個大約十二歲既細路見到,哈哈大笑。兩個狼狽不堪既所謂天使爬返起身之後,屋下面既屋主拎埋掃杷走咗出嚟,準備毒打呢兩條友,哼,居然敢晌佢屋頂搞搞震,冇錢爆房到走嚟人地屋頂?



呢個12歲細路就開口,喂,妳兩個唔想比人打死既就跟我走。跟跟下屋主冇再追嚟, 呢個時候美檸檬同黑熊先知佢地比人整古冇晒法力, 咁仲算係天使? 剛剛都算救咗佢地個細路晌旁邊仲等緊佢地講一聲多謝。



呢兩個冇禮貌既天使一句唔該都冇,就兩個鬼殺咁嘈嗌起交上嚟。 細路最後頂唔順就問,「喂,你兩個咩人嚟架?」黑熊唔太放個細路上心,美檸檬就自恃係乜鬼天使,話自己係天使,笑到個細路肚都痛埋。話「妳係天使? 咁我係玉皇大帝囉。」



兩個落難天使一時之間唔知點好,開始意識到唔可以再咁惡,反問返個細路,呢度邊度嚟? 細路一面不屑咁回應,「妳兩個偷渡落嚟架?」美檸檬呢刻知道要靠返呢個人,就求其話係,問有冇地方比佢地落腳,再問,細路,你係邊個。



「哈,好話喇,我就係雄霸呢個木屋區既人,我叫計數仔,妳地叫我數仔啦。」



[ 本帖最後由 計數佬 於 2020-10-18 08:37 PM 編輯 ]

回覆 引用 TOP

【歷程】

美檸檬自我介紹, 數仔未聽過咁怪既稱呼, 就叫咗佢地檸檬同黑熊。 搵地方? 得,跟我嚟。 熟悉木屋區既數仔搵到有間人地臨時搭建但已經丟空咗既木屋, 起既人搬走咗好耐, 估計應該唔會再返嚟,而且呢啲咁簡陋既木屋就算賣都唔值咩錢,無人會出錢買。

面積有百五呎,有間房同有個去水位,簡單傢私就冇喇,用木板搭既床都叫做有張。冇水冇電,僅僅算有瓦遮頭,廁所仲晌好遠既地方,公家既。黑熊面都黑晒想走,不過還是檸檬較為清醒,拉住佢,「今晚唔住呢度,仲可以去邊?」

第朝,數仔換晒校服帶咗啲 食物嚟,黑熊同檸檬好似成晚冇瞓過咁,發晒呆,數仔身為一個學生當然要返學。 呢兩個天使有咩打算真係唔知佢地。望住數仔帶嚟既食物, 佢地覺得邊度食得落口,手郁郁唸唸有詞好似想施咒變成美食,邊得吖。妳兩個真係當咗妳地係天使咩?

[ 本帖最後由 計數佬 於 2020-10-18 08:40 PM 編輯 ]

回覆 引用 TOP

【接受】


數仔走後, 檸檬同黑熊開始肚餓,現時佢兩個已變成係人類既體質,有食野既需要,兩個一直望住數仔帶嚟既所謂食物三個鐘,都落唔到手。但飢餓難當之下,佢兩個唯有互餵大家食,起碼,等自己個肚唔好再叫到行雷咁。

結果,六個鐘頭後,佢地比人發現,係一班細路,覺得兩個打扮咁古怪既一男一女晌一間空置殘舊木屋入面,做乜呢? 而比較大膽既小肥就行近d 望,比黑熊發現, 黑熊又想施展佢果d 所謂法術趕走佢地,可惜,施來施去都施唔到,仲比班細路笑佢鬼上身。

旁邊既小檸檬見到咁,唯有打圓場,小朋友你地好吖,姐姐同肥哥哥因為盪失路先晌呢度暫時住住先,請問你地父母呢? 點解你地咁細個佢地比你地周圍走? 小肥話,呢度d 大人個個都要做野搵食,邊得閒看住我地? 而且,我地最細果個都九歲,識照顧自己啦。




回覆 引用 TOP

【嘗試】


直到,數仔放學返嚟,一班細路好恭敬咁叫「大佬」,咁,數仔就話,乜妳兩個仲晌度? 冇地方去咩? 身上有冇錢呀? 冇錢馬死落地行,去搵野做賺錢吖嘛。 黑熊聽到仲嬲,佢認為堂堂一個天使點可能好似凡人咁要用勞力搵工賺錢? 簡直奇恥大辱。小檸檬卻有另類想法,話, 「不如,我地嘗試下過佢地人類生活,感受下佢地日常係點,都冇壞吖。」

當時求其搵既爛木屋,本來唔係好住得人,數仔開始吩咐其他細路去附近搵啲有用既野,水,布,木棍之類,屋企有工具既攞啲槌仔過嚟,釘,鋸,同埋刀,斧頭既野,夾手夾腳一齊整好呢個地方。

整咗接近四個鐘,啲細路要返屋企,個地方開始似啲樣,然後數仔話,「喂,黑熊」而黑熊就死叫住話佢叫黑熊天使,天乜鬼野使吖,唔叫你肥蟲你應該偷笑啦。數仔繼續講,由聽日開始我帶你去打工,而小檸檬,妳開始要學煮野食同做家務。 妳地有咩其他任務晌身都好,先搞掂妳地宜家既生活先,呢度妳地未必住得耐架。

[ 本帖最後由 計數佬 於 2020-10-18 08:41 PM 編輯 ]

回覆 引用 TOP

[隱藏]
 
【妥協】

第日,數仔放學後又過嚟,肥蟲應該已經比小檸檬勸掂咗,面黑黑咁問, 去邊度打工?咁好啦,尋晚已經問好路口果間車房,佢地想請個雜工,平時洗下車搬下野,打掃地方同擔擔抬抬,有時間就幫手整車換靈件,執頭執尾。朝九晚六,四十蚊日。四十蚊,當時晌街一碟三餸飯係三蚊。

安置咗肥蟲去車房返工,數仔帶咗唔知由邊度搵返嚟既煲,兩三個水桶,簡單既煮食工具,話仲未有錢買石油氣爐,就燒住柴先,呢度周圍都係木頭。真可憐,小檸檬呆若木雞,但唔照做,今晚果餐冇得食架喎,唔通又捱肚餓咩?

小檸檬初初笨手笨腳,一大半既野都係由12歲既數仔嚟做,最後煮好咗一餐飯,搞咗好多個鐘,然後小檸檬就問,數仔,你點解咁得閒既? 你屋企人唔擔心你架咩?而數仔話,屋企多咗兩個新成員,阿媽揍佢地都唔得閒理我,阿爸係要好似黑熊咁要出去賺錢養家, 邊得嚟妳地啲千金小姐咁幸福。咁啱黑熊就企正晌門口。 睇佢捱咗成日個慘樣,小檸檬問佢今日返工辛唔辛苦?黑熊就話「邊辛苦呢?呢啲簡單野, 輕而易舉。」真係咩?

坐落之後就輪到小檸檬忙,忙整理枱同櫈,忙裝飯,忙拎啲食得既餸出嚟。今次黑熊食得好開胃。仲問小檸檬,「呢啲野全部妳整既?」入夜後,數仔要走,佢兩口子果晚點過,天曉得。

[ 本帖最後由 計數佬 於 2020-10-18 08:43 PM 編輯 ]

回覆 引用 TOP

【體會】


如是者,過咗七日,黑熊開始適應車房工作,老闆見佢外地人,可能等錢使,就話可以預支二百蚊人工比黑熊先,黑熊望住呢二百蚊,哦,呢啲就係人類要用既錢。返咗七日,人地話今日冇乜野搞,早啲收工陪老婆啦。黑熊腦內一陣幻想,老婆 ...。

黑熊返到去發現漸漸熟咗手既小檸檬都冇偷懶, 忙住整呢樣整果樣,就係為咗每晚黑熊返嚟有餐飯食,流露出欣慰之色。更發現,正在勤力工作既小檸檬有如天使般既靚。 啋,人地本來就係天使。但靚,此情此境黑熊覺得真係好靚。點呢? 聽數仔講好似有更好既煮食工具,有時間,黑熊自己走咗去人類既舖頭問,呢啲 野點用?同埋,係咪可以用呢啲 錢嚟買?

黑熊比平時夜咗返,小檸檬正擔心係咪有咩事時,見黑熊一袋二袋攞好多野返嚟,仲有件新衫。但就用晒果二百蚊。死蠢,買野格價既野梗係叫埋數仔啦。結果乜都買貴咗。小檸檬甜在心頭。呢個時候,佢地兩個依然仲未有法力。想去執行咩咩懲罰人類既罪惡都唔得,要醫咗自己個肚先。

[ 本帖最後由 計數佬 於 2020-10-18 08:44 PM 編輯 ]

回覆 引用 TOP

【夫妻】

在人間的第十日,黑熊日頭要外出工作,獨自留下小檸檬晌間木屋,但當小檸檬要出去打水返嚟時就遇到幾個流氓出言調戲, 由於車房都係木屋區範圍,黑熊經常出出入入, 附近街坊大概估到佢地係新婚既兩公婆。眼見小檸檬遇到麻煩,就有人跑去通知黑熊,黑熊即刻掉低手頭工作趕返去,見有五六個人圍住小檸檬時,搶先衝埋去將人地推開,護在小檸檬身前。

流氓恃人多蝦人少,面前只係個肥佬,而佢地有六個人,就 ....。黑熊無計可施之下,附近街坊有人掉啲雜物出嚟,然後第個又掉,漸漸好多人都掉,將好多雜物掉向果幾個流氓。群眾壓力迫使叫呢幾個衰人快啲走,跟住有師奶做好心拎條大毛巾過嚟包住小檸檬,陰功囉,咁後生,遇到呢啲事一定嚇親,幸好妳老公返得嚟及時。

「老公」,小檸檬與黑熊互望,正想澄清時數仔出現,話「阿朱師奶,妳屋企咪有啲枱枱櫈櫈想換,話唔要既,陳師奶,妳屋企都有好多立雜野,拎幾件比人地啦,一場街坊 ...。」你一言我一語,氣氛融洽。呢半個月來佢地係首次同各街坊有計傾,黑熊感激各街坊幫忙,覺得人間有情呢句說話係真既。最衰就係冇晒法力,要時時擔心小檸檬安全。知道如果同附近既人熟絡啲,再下次有咩事都有個照應,開始放下身段,唔係為自己,而係為小檸檬。

[ 本帖最後由 計數佬 於 2020-10-18 08:45 PM 編輯 ]

回覆 引用 TOP

【重現】


又過多五日,黑熊日頭出去開始同其他街坊打招呼,活像一個真係人類咁,而屋入面既小檸檬就好似一個賢妻,黑熊有種幸福感覺。 剛啱見到遠處有個婆婆行路就嚟跌親,情急之下伸出隻手,突然,佢本來個法力重現,隔空定住咗個婆婆,等婆婆慢慢坐晌地下,呢個情景其他人唔係好覺,小檸檬同黑熊自然難掩喜悅之色,但奇怪點解會咁?

後來發現,天使落到凡間要施展法力係唔可以為自己,一定要為其他人。明白之後, 無論黑熊返車房,或者小檸檬日常都刻意偷偷施展法力用嚟幫附近街坊, 而街坊又好樂意接濟呢對新婚夫婦。




回覆 引用 TOP

【災難】


好景不常,比天上邪惡既矮雪梨晌個水晶球入面見到。 妒忌心極重既矮雪梨火都滾埋, 立刻施展佢既分身奇幻術,先令木屋區上空落一場離奇既滂沱大雨,由於佢地暫住既地方係低窪地區, 後面係一座山,呢場雨,就令到山上既泥土鬆軟,先有碎石從山上跌落嚟,出現山泥傾瀉現像,壓爛後面兩間木屋,有人被困。

漸漸有返法力既兩個天使都同其他街坊一齊走出屋睇下情況, 但場面越來越惡劣,天上既矮雪梨一直加強施壓,小檸檬已察覺呢個唔係天災,去,我地要救人。黑熊有隔空移物本事,小檸檬有轉動風向能力,當危難當前人人爭相走避,而兩人就有默契地趨前,將從山上滾落嚟既石頭打碎再吹走,化解呢場危難。街坊們目定口呆,你兩個 ...超人嚟架?

當穩定之後,黑熊開始出現怒火,話,真正既邪惡唔在於人心,而係在於掌控人間既天使手入面,黑熊向天大叫,睇住嚟,等我地返上嚟之後,妳一定會得到應有既懲罰。

[ 本帖最後由 計數佬 於 2020-10-18 08:46 PM 編輯 ]

回覆 引用 TOP

[隱藏]
 
【危險】


但係目前, 先安定好周圍已經受影晌既居民,黑熊拖住小檸檬隻手,一個眼神,心意互通,兩人手牽手開始原地轉圈,奇異魔法將周圍凌亂既環境清理得乾乾淨淨, 因為係為人地而做。不過咁,又激嬲晌天上睇住水晶球既矮雪梨。哼一聲, 比頭先嚴重十倍既雨勢同風勢再嚟一次無情既災害,更大更多既山石從山上滾下,黑熊意識到危險,命小檸檬帶各人先離開。

吓? 你一個搞得掂? 黑熊心知搞唔掂,但,安全, 心底裡最希望係小檸檬得到安全,呢點最重要。一聲令下,走!

數仔呢? 佢居住個地方冇事,係山既另一邊,屬高地,搭建得穩如泰山,但數仔依然有跑過嚟,目睹黑熊既一切,心想,的確係天使或者神仙先有呢個能力。而且,仲係個拯救緊當時受難既人既一個真英雄,出場接住黑熊講既野。走,妳地留晌度會成為黑熊既負累。

旁邊好多細路好聽命數仔講野,畢竟一年前,徒手做低個蝦蝦霸霸小霸王既人,就係數仔。數仔帶住各人走既同時,臨走對黑熊講咗句,「小心d ,要顧埋你自己安全。」

回覆 引用 TOP

【一夫當關】


場面開始失控,黑熊施展既能力亦越來越大,小檸檬目定口呆,平時冇咁犀利架喎, 因為成座山,上層有一半沙石已被整碎,連同橫風橫雨密集咁向下衝緊落嚟, 呢個已經唔係任何人可以頂得順既情況。天上既矮雪梨好似失控咁癲咗,場面越來越恐怖,地上既黑熊獨力難支,靈機一觸,將倒下既山石晌另一邊冇乜人起屋既地方,砌返另一座山出嚟。咁樣移影換影,黑熊臨危不亂既應變,反應都算快喎。

矮雪梨開始更過份,將碎石轉移目標,投向小檸檬佢地逃難既路線,黑熊,把身一橫用身嚟阻擋,開始有被石頭割傷既傷勢,但口中依然吐出一個字,走!漸漸,堆砌出嚟既山,已經同原本果個山既高度幾乎接近,已再無危險。

回覆 引用 TOP

【天真無邪】


當時係夜晚,一場連天文台都冇預告既奇異風暴終於停頓落嚟。各人逃到高地後稍稍喘息,一時間驚魂未定,小檸檬回望,黑熊呢? 居民在一場咁怪既災難死裡逃生應該慶幸,但見面前負傷走近既黑熊,依然係有d驚,怪物喎。一場浩劫後總有人受傷,幸好冇人死。小檸檬施展法術令受輕傷既居民痊癒,當時好多大人都好驚訝,只有天真既小孩子們,做出佢地天真無邪既人性反應。

小肥先開口,「多謝妳地吖,仙女姐姐。」然後一個接住一個異口同聲。與此同時,數仔開口,喂 ........。



待續  

回覆 引用 TOP

引用:
原帖由 計數佬 於 2020-10-16 08:33 PM 發表
悠閒的天使   
聽唔到喎




回覆 引用 TOP

引用:
原帖由 level2 於 2020-10-17 14:27 發表

聽唔到喎


頭先搞錯.... 呢個先真

https://drive.google.com/file/d/14kb1m4iYKgUZLActSxax-KqgVcCocZKU/view?usp=sharing

回覆 引用 TOP

[隱藏]
 

接住落嚟既錄音版本,




悠閒的天使,下集






https://drive.google.com/file/d/15OPA0DSoynR6cIHrJSLRXCc6saT93GHx/view?usp=sharing

回覆 引用 TOP



伸延閱讀
 
 27 12
 提示:支持鍵盤翻頁 ←左 右→ 發新話題發佈投票
請先登入
小貼士:
依家可以用“@”tag會員啦!