[小說] 病原溢出 (Spillover)
[按此打開]
[隱藏]
—病原溢出 (Spillover)—
病原溢出是指病原獲得感染新物種宿主能力，進而感染新宿主、在新宿主個體間傳播的現象…..以下係一位退休華籍英兵(名叫阿森)的日記.
***2000年9月27號***
其實97年退咗役之後我都有兩三年搵唔到嘢做. 老實講, 我哋呢啲失業軍佬, 咁耐以來學返嚟嘅技能, 好難喺現代社會用得返出嚟. 我個範仲要係咁specific. 好彩嘅有幾個師兄咪跟咗啲有錢佬做保鑣囉. 但係香港邊洗咁多保鑣..
講起保鑣今日明哥打嚟, 問我有咩撈. 佢同我講佢個中東老細搵緊一個識操控微型軍用空中航拍機(Drones)嘅人幫佢做D嘢. 雖然開正我個範, 不過都唔知合唔合法. 睇嚟佢都係想偷拍下佢D生意對手之類啦. 冇理由係揄拍女人沖涼卦.. 當年明哥係我commanding officer, 都好睇我. 所以我聽日點到會去見下佢老闆.
***翌日, 2000年, 9月28日 (阿生的錄音)***
明哥同阿森講: 阿森, 呢個係我老闆的代表律師Mr. Farouk.
Mr. Farouk: 阿森, 你好, 很高興認識你. 我喺香港好多年, 你可以同我講廣東話.
阿森: Mr. Farouk 幸會, 幸會. 你係生意人一定好忙, 我有啲咩嘢可以幫到你.
Mr. Farouk: 阿明話俾我知你當時喺軍隊入面係最出色嗰個小型冇人監察錄影機的操控人員. 我有一份差事想你幫我做你有冇興趣?
阿森: Mr. Farouk, 多謝你嘅賞識. 不過你都好清楚呢啲係軍用科技. 如果攞嚟偷睇或者偷聽, 最少喺香港係犯法的.
Farouk: 呢點我哋當然明白, 之所以咁老闆就搵咗我呢一個律師嚟同你講. 法律方面嘅嘢你唔需要擔心公司會搞掂. 有啲咩事公司會負責. 最重要係你要去影嘅地方嚴格來講香港係冇Jurisdiction的. 所以只要你返到嚟基本上係冇人可以比任何麻煩你.
阿森: 即係要出國?
Farouk: 森, 希望你明白, 我哋只可以透露咁多. 你嘅工作好簡單只係要駕駛㗎航拍機, 拍攝大約20分鐘的影片. 咁你嘅工作就會完成. 我哋會接返你返嚟.
Farouk: 我都明白你要少少時間決定. 我哋當然會有報酬俾你. 只要你應承, 出發前我哋會比20萬美金你. 你嘅任務完成後, 我哋會再比多50萬美金你. 之後我哋公司亦都可以請你做full time 員工, 我哋需要好多保安方面嘅人才. 尤其係監控, 返監控同埋情報收集方面的技術. 以你喺軍事情報做咗咁耐嘅經驗我相信我哋一定安排到份工俾你做. 你考慮吓. Nice meeting you. (然後聽到一些枱櫈移動的聲音, 應該是大家雙方互相握手然後Farouk離開的聲音).
***同日meeting完結之後, 阿明開車送阿森離開公司***
阿森: 明哥多謝你嘅介紹.
明:唔好客氣, 你自己諗吓啦. 我見你呢幾年都冇乜嘢撈.
森: 明哥你都知嗰年之後, 我患左”軍人創傷後遺症”. 我退咗役之後都完全放鬆唔到. 就算入間普通餐廳坐, 我都會搵個睇到全間餐廳嘅位, 然後背向牆壁. 我就連行街, 都覺得危險嘅事會隨時發生. 我又冇walkie, 又冇槍, 我人變到好多疑, 好冇安全感. 明哥我唔想呃你, 其實我頭先一路都有用錄音機偷偷地錄音. 我直到而家都錄緊… 呢啲係咪叫職業病….
明: 森, 其實我哋個個當時都覺得你好威, 啲鬼佬都睇得起你呢一個華籍英兵, hand pick你去啲operation. 咁你揸機又真係有一手的. 不過估唔到..唉.. 你依家就唔太精神.
森: 明哥, 其實你老板做咩生意? 我頭先睇Farouk張卡片寫Dark Pond Private Equity Group, 我連聽都未聽過. Head Office又係中東.
明: 其實我都唔係太清楚, 我做保鑣. 主要係負責老細喺香港時的保安. 佢哋係中東人成日飛來飛去. 以我所知公司主要做醫療物資起家, 至於香港呢邊, 都係做吓投資咁囉.
森: 嗯….
森: 明哥, 其實我冇理由唔接受呢份工. 呢一筆錢足夠我買幾間屋然之後退休. 同埋我諗做返啲軍人嘢, 對我嘅病情應該會有幫助.
待續….
登入/註冊
菠蘿油，正！